ᑲᓇᑕᐅᑉ ᒐᕙᒪᒃᑯᖏᑦ ᑐᓂᓯᓚᐅᖅᑐᑦ ᐊᐅᓚᑦᑎᓂᐊᕐᓗᑎᑦ ᐱᔨᑦᑎᕋᕐᓗᑎᑦ ᑳᓐᑐᓛᑦᑎᒍᑦ ᑲᓇᑕᒥ ᖁᑦᑎᑦᑐᒥ ᖃᐅᔨᓴᕐᕕᒻᒥᑦ, ᐱᕕᖃᖅᑎᑦᑎᖃᑦᑕᕐᓗᑎᑦ ᐃᓄᓐᓂᑦ ᓇᒻᒥᓂᖃᖅᑎᐅᔪᓂᒃ

ᑲᓇᑕᒥ ᖁᑦᑎᑦᑐᒥ ᖃᐅᔨᓴᕐᕕᒃ (CHARS) ᓯᓚᕐᔪᐊᒥ ᑖᓐᓇ ᐅᑭᐅᖅᑕᖅᑐᒨᖓᔪᓂᒃ ᖃᔨᓴᕐᕕᐅᕙᑦᑐᖅ ᐃᖏᕐᕋᑦᑎᐊᖁᓪᓗᒋᑦ ᖃᐅᔨᓴᕐᓂᖏᑦ ᕿᒥᕐᕈᓂᖏᓐᓂᓪᓗ ᑲᓇᑕᐅᑉ ᐅᑭᐅᖅᑕᖅᑐᖏᓐᓂ. ᑖᓐᓇ ᐱᐅᓂᖅᐹᕐᔪᐊᕌᓗᓐᓂᒃ ᖃᐅᔨᓴᕐᕕᓂᒃ ᐅᐊᔭᒨᖅᑐᕈᓘᔭᕐᓂᓪᓗ ᐱᕕᖃᖅᑐᓂ, ᓱᓇᒃᑯᑖᖃᖅᑐᓂ ᖃᐅᔨᓴᕐᕕᖃᖅᑐᓂᓗ ᖃᐅᔨᓴᖅᑎᓄᑦ ᐳᓚᕋᖅᑎᓄᓪᓗ ᖃᐅᔨᓴᖅᑎᒻᒪᕆᓐᓄᑦ ᖃᐅᔨᓴᕈᒪᔪᓄᑦ ᐅᑭᐅᖅᑕᖅᑐᒥ, ᐊᔾᔨᐅᖏᑦᑐᓂᓪᓗ ᖃᐅᔨᒪᖃᑦᑕᐅᑎᖃᑦᑕᖁᓪᓗᒋᑦ ᖃᐅᔨᓴᕐᕖᑦ ᑕᐃᒪᐃᑦᑐᖃᕐᒥᔪᖅ.

ᑲᓇᑕᒥ ᖁᑦᑎᑦᑐᒥ ᖃᐅᔨᓴᕐᕕᒃ (CHARS) ᐊᔾᔨᐅᖏᑦᑐᓂᑦ ᓱᓇᒃᑯᑖᓕᒃ ᐅᖓᓯᑦᑐᒦᑦᑐᓂ, ᐊᕙᑎᕗᓪᓗ ᖃᐅᔨᒪᓐᖏᑖᓗᒋᓪᓗᑎᒍ ᖃᓄᐃᑦᑑᓂᐊᕐᒪᖔᖅ ᐊᔅᓱᕉᑎᖃᖃᑦᑕᖅᑐᑎᓪᓗ ᑭᓱᑐᐃᓐᓇᕐᓂᑦ. ᑲᓇᑕᒥ ᖁᑦᑎᑦᑐᒥ ᖃᐅᔨᓴᕐᕕᒃ (CHARS) ᐱᖓᓲᓕᖅᑲᖓᔪᓂᒃ ᐊᑐᖃᑦᑕᕐᖓᑕ:

ᖃᐅᔨᓴᕐᕕᒃ ᒪᑐᐃᖅᑕᐅᓚᐅᖅᓯᒪᔪᖅ ᐋᒡᒌᔅᓯᒥ 2019−ᖑᑎᓪᓗᒍ.

ᓄᑖᖅ ᐊᑯᓂᒧᑦ ᐃᓪᓗᐊᓗᒃ ᐊᐅᓚᑕᐅᓗᓂ ᐱᔨᑦᑎᕋᕐᕕᐅᓂᐊᖅᑐᖅ ᑳᓐᑐᓚᑦᑎᒍᑦ

ᑭᒃᑯᑐᐃᓐᓇᕐᓂᑦ ᐱᔨᑦᑎᕋᖅᑏᑦ ᓂᐅᕐᕈᑎᖃᕐᓂᒧᓪᓗ ᑲᓇᑕᒥ (PSPC) ᐊᑐᐃᓐᓇᐅᑎᑦᑎᔪᑦ ᐱᓕᕆᐊᓂᑦ ᐊᐅᓚᑦᑎᒋᐊᖃᕐᓂᖏᓐᓂ ᓂᐅᕐᕈᑎᖃᕐᓂᒧᓪᓗ ᐱᔨᑦᑎᕋᐅᑎᓂᒃ ᒐᕙᒪᑐᖃᒃᑯᓐᓂ ᐊᒻᒪᓗ ᐅᑭᐅᖅᑕᖅᑐᒥ ᖃᐅᔨᒪᓂᕐᒧᑦ ᑲᓇᑕᒥ ᓴᓇᔭᐅᓯᒪᔪᖅ ᐊᔾᔨᐅᖏᑦᑑᓪᓗᓂ ᑲᓇᑕᒥ ᖁᑦᑎᑦᑐᒥ ᖃᐅᔨᓴᕐᕕᒃ (CHARS). ᐊᒻᒪᓗ, ᑭᒃᑯᑐᐃᓐᓇᕐᓂᑦ ᐱᔨᑦᑎᕋᖅᑏᑦ ᓂᐅᕐᕈᑎᖃᕐᓂᒧᓪᓗ ᑲᓇᑕᒥ (PSPC) ᑲᒪᓯᒪᒻᒥᔪᑦ ᑕᐃᒪᐃᑦᑐᒥᑦ ᐱᔨᑦᑎᕋᐅᑎᓂᒃ ᐅᓪᓗᒥᒧᑦ ᐋᖅᑭᓱᖅᓯᒪᑦᑎᐊᕐᓗᑎᑦ. ᑖᓐᓇ ᓄᑖᖅ ᐊᑯᓂᒧᑦ ᑳᓐᑐᓚᑦᑕᐅᓂᐊᖅᑐᖅ ᐱᔨᑦᑎᕋᐅᑎᐅᓗᑎᑦ ᐊᐅᓚᑦᑎᑎᓪᓗᒋᑦ ᐃᓗᐊᓂ.

ᐊᔾᔨᒌᓐᖏᑦᑐᓂᑦ ᐱᔨᑦᑎᕋᕐᓗᑎᑦ ᒪᑯᓂᖓ ᓄᑖᕐᓂᑦ ᑳᓐᑐᓛᖑᔪᓂᒃ, ᐃᓪᓗᒥᓪᓗ ᐊᐅᓚᑦᑎᓂᕐᒥᑦ ᐊᒻᒪᓗ ᑲᒪᒋᔭᖃᕐᓂᕐᒥᑦ; ᐊᐅᓚᑕᐅᓗᑎᑦ ᐱᔨᑦᑎᕋᐅᑎᖏᑦ ᐅᖄᓚᔪᖃᕐᓂᖅᑲᑦ ᖃᓄᐃᑦᑐᖃᕐᓂᖅᑲᓪᓘᓐᓃᑦ; ᑐᐊᕕᕐᓇᖅᑐᓂ ᐱᔨᑦᑎᖅᑕᐅᒋᐊᓕᓐᓂᒃ ᐃᖅᑲᓇᐃᔭᕐᕕᓐᓂᑦ; ᐊᑮᑦᑐᕈᓐᓇᓂᕐᒨᖓᔪᓂᒃ ᐱᔨᑦᑎᕋᐅᑎᓂᒃ; ᓴᓗᒻᒪᓴᖅᑕᐅᒋᐊᓕᓐᓂᒃ ᐃᓪᓗᐊᓗᒻᒥ; ᑐᔪᕐᒥᕕᒻᒥ ᐊᐅᓚᑦᑎᓂᕐᒥᑦ; ᖃᐅᑕᒫᑦ ᖃᐅᔨᓴᖅᑕᐅᖃᑦᑕᕐᓗᑎᑦ ᐳᔫᕐᓂᖏᑦ; ᐊᕙᑎᑦᑎᓐᓂ ᐊᐅᓚᑦᑎᓂᕐᒥᑦ; ᐊᐅᓚᑕᐅᓂᖏᑦ ᖃᐅᒪᓯᒥᐅᑏᑦ; ᓱᓇᒃᑯᑖᖏᑦ ᖃᐅᔨᓴᖅᑕᐅᓂᖏᑦ; ᐃᓪᓗᐊᓗᒻᒥᑦ ᐊᐅᓚᑦᑎᓂᖏᑦ ᐸᕐᓇᐅᑎᖃᕐᓂᖏᑦ; ᐃᓪᓗᐊᓗᒃ ᖃᐅᔨᓴᖅᑕᐅᖃᑦᑕᕆᐊᖃᕐᓂᖓ, ᐊᓯᖏᓪᓗ ᓴᓇᒋᐊᓖᑦ ᐊᖏᓗᐊᓐᖏᑦᑐᑦ. ᑳᓐᑐᓛᑦᑕᐅᒐᔭᖅᑐᖅ ᔫᓂᒥᑦ 1, 2021−ᒥᑦ, ᓰᑏᑉᐱᕆᒧᑦ 30, 2026−ᒧᑦ, ᐱᖓᔪᐊᓪᓗ ᓇᓖᕌᕈᑎᒃ ᐊᑐᕐᓗᒍ ᐊᕐᕌᒎᓐᓄᒃ ᒪᕐᕉᓐᓄᒃ ᐃᖏᕐᕋᖃᑦᑕᕐᓗᓂ ᐊᑐᓂ, ᑕᐃᒪᐃᒐᔪᓲᖑᒻᒪᑕ ᑳᓐᑐᓛᑦᑕᐅᓯᒪᔪᑦ ᐊᐅᓚᑦᑎᓂᐊᖅᑐᑦ ᐱᔨᑦᑎᕐᓗᑎᑦ.

ᓂᐅᕐᕈᑎᖃᕐᓂᕐᒧᑦ ᐃᓕᖅᑯᓯᐅᕙᑦᑐᑦ

ᑭᒃᑯᑐᐃᓐᓇᕐᓂᑦ ᐱᔨᑦᑎᕋᖅᑏᑦ ᓂᐅᕐᕈᑎᖃᕐᓂᒧᓪᓗ ᑲᓇᑕᒥ (PSPC) ᐊᐅᓚᑦᑎᓗᑎᑦ ᓂᐅᕐᕈᑎᖃᕐᓂᒧᓪᓗ ᐃᓕᖅᑯᓯᖃᕐᓗᑎᑦ, ᐱᓕᕆᐊᕆᔭᕆᐊᖃᖅᑕᖏᓐᓂ ᓱᓇᒃᑯᑖᕐᓂᑦ ᓂᐅᕕᕆᐊᖃᖅᑕᖏᓐᓂ ᐱᔨᑦᑎᕋᐅᑎᓂᓪᓗ ᒐᕙᒪᑐᖃᒃᑯᓐᓂ ᐱᔾᔪᑎᖃᕐᓗᑎᑦ ᐃᖅᑲᓇᐃᔭᕐᕕᒥᓪᓗ ᐊᑭᑭᓐᓂᖅᐹᖅᑎᒍᑦ ᑲᓇᑕᒥᐅᑕᕐᓄᑦ. ᑳᓐᑐᓛᖑᕙᑦᑐᑦ ᐊᐅᓚᑕᐅᑦᑎᐊᕐᓗᑎᑦ ᒪᑐᐃᖓᑦᑎᐊᖃᑦᑕᕐᓗᑎᓪᓗ, ᑕᐃᒪᐃᓪᓗᐊᑎᑦᑎᖃᑦᑕᕐᓗᑎᑦ ᐊᔾᔨᒌᑎᑦᑎᔫᒥᖃᑦᑕᕐᓗᑎᓪᓗ ᐃᓕᖅᑯᓯᖃᕐᓗᑎᑦ, ᑕᐃᒫᒃ ᑲᓇᑕᒥᐅᑦ ᐱᔪᓐᓇᕐᓂᐊᕐᖓᑕ ᑮᓇᐅᔭᓂᑦ ᐊᑐᑦᑎᐊᖃᑦᑕᖁᓗᒋᑦ.

ᐱᔨᑦᑎᕋᐅᑎᓪᓗᒋᑦ ᑕᕝᕙᓂ ᑳᓐᑐᓛᒥᑦ ᐊᑐᐃᓐᓇᐅᑎᑕᐅᓗᑎᑦ ᓄᓇᕗᒻᒧᑦ, ᓂᐅᕐᕈᑎᖃᕐᓂᒧᑦ ᐃᓕᖅᑯᓯᐅᔪᑦ ᒪᓕᒋᐊᓕᑦ ᐊᖏᕈᑕᐅᓯᒪᔪᓂᒃ ᐃᓄᓐᓂᑦ ᓄᓇᕗᑦ ᓄᓇᑖᕈᑎᒧᑦ ᑯᐃᓪᓗ ᑭᒡᒐᖅᑐᐃᔨᖏᓐᓂ ᑲᓇᑕᒥ (ᓄᓇᕗᒻᒥ ᐊᖏᕈᑎ) ᐊᒻᒪᓗ ᑎᓕᔭᐅᔾᔪᑎᒋᓯᒪᔭᖏᓐᓂ ᒐᕙᒪᒃᑯᑦ ᑳᑐᓐᓛᖏᓐᓂ, ᐱᖃᓯᐅᔾᔨᓪᓗᑎᑦ ᐃᓪᓗᓂᑦ ᐱᖁᑎᐅᔪᓂᒃ ᐊᑐᖅᑐᐊᕐᓂᕐᒧᑦ, ᓄᓇᕗᑦ ᐃᓗᐊᓂ. ᑕᐃᒪᐃᓐᓂᖓᓐᓄᑦ, ᐊᑭᑦᑐᕋᐅᑎᓂᖅᑕᖃᓗᐊᓐᖏᑦᑐᖅ ᐊᑎᓕᐅᖅᓯᒪᔪᓂᒃ ᐃᓄᓐᓂᑦ ᑎᒥᐅᔪᓂᒃ, ᐃᓄᐃᑦ ᓇᒻᒥᓂᖁᑎᖏᓐᓂ ᐊᑎᓕᐅᖅᓯᒪᔪᓂᒃ ᓄᓇᕗᑦ ᑐᓐᖓᕕᒃᑯᖏᓐᓄᑦ.

ᓄᓇᕗᑦ ᐅᑭᐅᖅᑕᖅᑐᒥ ᐱᔨᑦᑎᕋᖅᑏᑦ ᐊᑭᑦᑐᕋᐅᑎᔪᓂᒃ ᓵᓚᓖᑦ. ᑐᔅᓯᕋᐅᑎᐅᓚᐅᖅᓯᒪᔪᒥᑦ ᓂᐅᕐᕈᑎᖃᕐᓂᕐᒧᑦ ᐃᓕᖅᑯᓯᐅᓂᐊᖅᑐᓂᒃ, ᑐᓂᓯᓚᐅᖅᓯᒪᔪᑦ ᐃᓄᓐᓂᑦ ᐃᑲᔫᑎᖃᕐᓂᕐᒧᑦ ᐸᕐᓇᐅᑎᒥᑦ ᖃᓄᖅ ᐃᖅᑲᓇᐃᔭᖅᑎᑦᑎᖃᑦᑕᕐᓂᐊᕐᒪᖔᑕ ᐃᓄᓐᓂᑦ, ᐃᓄᓐᓂᑦ ᐱᓕᕆᔨᒻᒪᕆᓐᓂᑦ ᐱᔨᑦᑎᕋᖅᑎᓂᑦ, ᐃᓄᓐᓃᓐᖔᖅᑐᓂᓪᓗ ᓱᓇᒃᑯᑖᖅᑖᖃᑦᑕᕐᓗᑎᑦ, ᐃᓕᓐᓂᐊᑎᑦᑎᖃᑦᑕᕐᓗᑎᓪᓗ ᐃᖅᑲᓇᐃᔭᖅᓯᓐᓈᖅ ᐱᓕᒻᒪᓴᕐᓗᑎᓪᓘᓐᓃᑦ ᐃᓄᐃᑦ ᐃᖅᑲᓇᐃᔭᖅᑎᖏᑦ. ᑐᔅᓯᕋᐅᑎᖓᓂᑦᑕᐅ, ᐅᖃᓚᐅᖅᓯᒪᔪᑦ ᖃᓄᖅ ᑲᔪᓯᑎᑦᑎᓂᐊᕐᒪᖔᑕ ᒪᓕᒋᐊᓕᖏᓐᓂ ᐃᓄᐃᑦ ᐃᑲᔫᑎᔅᓴᖏᓐᓄᑦ ᒪᓕᒐᕐᓂᑦ, ᒪᑯᓂᖓᓗ ᐊᓪᓚᕕᐅᑉ ᐃᓗᐊᓂ, ᐃᖅᑲᓇᐃᔭᖅᑎᖃᕐᓗᑎᑦ ᐊᓪᓚᑦᑎᓂᑦ ᐅᕝᕙᓘᓐᓃᑦ ᐃᓪᓗᕐᔪᐊᓂᑦ ᐊᓯᖏᓐᓂ, ᐊᒻᒪᓗ ᐊᓪᓚᕕᓐᓂᑦ ᐅᕝᕙᓘᓐᓃᑦ ᑳᓐᑐᓛᔅᓯᑲᓐᓂᕐᓗᑎᑦ, ᐃᓗᐊᓂ ᓄᓇᕗᑦ.

ᑭᒃᑯᑐᐃᓐᓇᕐᓂᑦ ᐱᔨᑦᑎᕋᖅᑏᑦ ᓂᐅᕐᕈᑎᖃᕐᓂᒧᓪᓗ ᑲᓇᑕᒥ (PSPC) ᐱᓕᕆᓂᐊᕐᒥᔪᑦ ᑕᐃᒪᐃᓪᓗᐊᑎᑦᑎᓂᕐᒥᑦ ᕿᒥᕐᕈᑎᐊᕐᓗᑎᑦ ᑐᕌᒐᖏᓐᓂ ᐊᑐᐃᓐᓇᐅᑎᑦᑎᓗᑎᑦ, ᐊᓯᖏᓐᓃᓐᖔᖅᑐᓂᓪᓗ ᑐᓴᖃᑦᑕᕐᓗᑎᑦ ᓂᐅᕐᕈᑎᖃᕐᓂᕐᒧ ᐃᓕᖅᑯᓯᖓᑦᑕ ᒥᔅᓵᓄᑦ. ᐅᓪᓗᒥᒧᑦ, ᑕᐃᒪᐃᓪᓗᐊᑎᑦᑎᒋᐊᖃᕐᓂᖏᓐᓂ ᐅᓐᓂᓗᖅᓴᖅᓯᒪᔪᖃᓐᖏᑦᑑᒐᓗᐊᖅ, ᐊᒻᒪᓗ ᑭᖑᓪᓕᖅᐹᒥ ᐅᓂᒃᑳᖅ ᐱᔭᕇᖅᓯᒪᓂᐊᖅᑐᖅ ᓴᖅᑭᖅᑕᐅᓗᓂᓗ ᑭᒃᑯᑐᐃᓐᓇᕐᓄᑦ ᐅᓂᒃᑳᕐᕕᐅᑲᐃᓐᓇᓚᐅᕐᓗᑎᑦ ᑕᐃᒃᑯᓄᖓ ᐊᑭᑦᑐᕋᐅᑎᓯᒪᔪᓄᑦ ᐱᓐᓂᖏᑦᑐᓄᑦ.

Date modified: